ദിവസങ്ങളോളം ഹരിയാനയിലെ ഒരു ഗ്രാമത്തിൽ ഭീതി പരത്തിയ കുരങ്ങനെ ഒടുവിൽ നാട്ടുകാർ പിടികൂടി. പന്ത്രണ്ടിലധികം പേരെ കടിച്ചും പരിക്കേൽപ്പിച്ചും വലച്ച കുരങ്ങനെയാണ് സാഹസികമായി പിടികൂടിയത്. എന്നാൽ പിടികൂടിയതിന് പിന്നാലെ ജനക്കൂട്ടത്തിന്‍റെ രോഷത്തിന് കുരങ്ങ് ഇരയാകുന്ന ദൃശ്യങ്ങൾ സമൂഹമാധ്യമങ്ങളിൽ വൈറലായിരിക്കുകയാണ്.
ഒക്ടോബർ 19ന് ഹരിയാനയിലെ പൽവൽ ജില്ലയിലെ മേഖലയിലാണ് സംഭവം. കുരങ്ങനെ പിടികൂടിയ ഒരാൾ അതിനെ തോളിലേറ്റിക്കൊണ്ടുപോകുന്നതും പിന്നാലെ ആഹ്ലാദപ്രകടനവുമായി വലിയൊരു ജനക്കൂട്ടം നടക്കുന്നതും വീഡിയോയിൽ കാണാം. ആഹ്ലാദപ്രകടനത്തിനിടയിൽ ചിലർ ദേഷ്യം മൂത്ത് കുരങ്ങനെ തല്ലുന്നതും ദൃശ്യങ്ങളിൽ വ്യക്തമാണ്. പിന്നീട് കുരങ്ങുമായി ഇയാൾ മറ്റ് രണ്ടുപേർക്കൊപ്പം മോട്ടോർസൈക്ലിൽ കയറി പോവുകയായിരുന്നു.
നിരവധി പേരെ ആക്രമിക്കുകയും പന്ത്രണ്ടിലധികം പേർക്ക് കടിയേൽക്കുകയും ചെയ്തതോടെ പ്രദേശവാസികൾ കടുത്ത ഭീതിയിലായിരുന്നു. തുടർന്ന് കുരങ്ങനെ പിടികൂടുന്നവർക്ക് ഹത്തിൻ മുൻസിപ്പൽ കൗൺസിൽ ചെയർപേഴ്സന്‍റെ ഭർത്താവ് 51,000 രൂപ പാരിതോഷികം പ്രഖ്യാപിച്ചിരുന്നു.
ഏകദേശം പത്ത് ദിവസത്തെ ശ്രമത്തിനൊടുവിലാണ് കുരങ്ങനെ ഒടുവിൽ പിടികൂടാൻ സാധിച്ചത്. ഇത് പ്രദേശവാസികൾക്ക് വലിയ ആശ്വാസമായിട്ടുണ്ട്.
